Makaeoeoy nga nagdangop sa Bombo Radyo ro sangka senior citizen matapos nga ginaalegar nga nalokohan it nagpakilaea nga empleyado sigon it provincial government.
Suno sa tagreklamo nga si Estelita Castro, 72-anyos it Brgy. Agbanawan, Banga nga kapin sa P32,000 pesos ro nabueo kana it nakilaea nga si Prince Carl Ibañez it Brgy. Cogon, Lezo nga binaligyaan pa sigon nana raya it baka sa kasugot nga pagabayluhan kana it eogta.
Ginpahayag dugang ni Castro nga ro nasambit nga kwarta hay ibakae gidman nana it eogta kon siin si Ibañez ro nagtanyag kana.
Apang, halin pa ko buean it Hunyo ro andang inistoryahan ag hasta sa makaron hay uwa it ginata-o nga eogta si Ibañez sa baylo ana nga ginabaliwala ro tawag ag text kana it tagreklamo.
Hinyo ni Castro nga magtuman sa hinambaean si Ibañez ag kon uwa it ginata-o nga eogta hay ibalik eon lang ro anang kwarta para may magamit imaw sa anang pang adlaw-adlaw nga kinahang-eanon.
Samtang sa pihak nga parte, uwa man ginpaeampas it ginareklamong si Ibañez ro tinago nga kwarta sa bu-o ni Maria Teresa Navarra it Bgy. Libas, Banga matapos nga gintanyagan man nana raya nga magabulig imaw sa pagproseso sa pagbueo it driver’s license it anang asawa sa halaga nga P3,000 pesos.
Ginbuka sigon ro bu-o ag ginta-o kana ro kwarta bangud sa pagsalig nga makabulig imaw kanda hasta nga ginpabueo pa nana it certificate of indigency sa barangay si Navarra.
Mag-eowas kara, nadugangan pa ro nasambit nga kantidad matapos nga naghinyo imaw sa mga tagreklamo nga maghueam it kwarta agud nga ibayad sa anang gingaranturan nga tawo.
Hasta sa makaron hay uwa eon kanda nakapakita si Ibañez.
