KALIBO, Aklan—Nagapadayun ro satellite registration it Commission on Elections sa mga kabarangayan sa probinsiya it Aklan nga gin-umpisahan ko Enero 20 it makaron nga dag-on.
Suno kay Crispin Raymund Gerardo, municipal election officer it New Washington ag tagapaghambae it Comelec-Aklan nga tuyo kara nga mas maabu ro makapagparehistro ag indi eon mabudlayan ro mga registrant sa pag-agto sa COMELEC offices.
Ginpahayag dugang nga mabahoe ro mabulig kara eabi pa ag sangkiri ro andang mga empleyado.
Mag-eowas sa pagpa-rehistro hay pwede man nga magpatigayon it re-activation ukon change status.
Kahapon hay nagpatigayon sanda it satellite registration sa barangay Mabilo, New Washington kon sa siin maabu man nga mga residente ro nagpasakop eabi eon ro mga senior citizens ag mga persons with disability ukon PWDs.
Hin-aga nga adlaw it Sabado hay naka-schedule sanda sa Brgy. Mabilo, Kalibo, sa Miyerkules hay sa Garcia College of Technology ag Aklan State University Banga-campus.
Target sigon nanda makaron nga magpatigayon it satellite registration kada Domingo sa mga barangay ag mga eskwelahan nga kon sa siin maabu ro mga pwedeng magpa-rehistro.
Nagagamit man sigon ro Comelec it digitize machines sa pagbo-oe it biometrics kapareho it digital picture, finger prints ag signature.
Pila sigon sa mga importanteng requirements nga andang ginapangayo hay ro valid ID ag birth certificate.
