BALITA Espesyal– Sangka kontrobersiyal nga scientist ro ginasugid nga gin-operahan ro anang kaugalingon nga utok samtang sa sueod it anang baeay sa Kazakhstan!
Suno sa report, naubusan it masobra sa sang litrong dugo ro Russian scientist nga si Michael Raduga matapos nana nga ipaidaeum ro anang kaugalingon sa brain surgery.
Raya hay agud nga mag-implant it electrode sa anang utok nga sa tan-aw nana hay posibleng makapagkontrol it anang damgo.
Si Raduga hay bukon it neurosurgeon ukon doktor.
Imaw hay sangka scientist ag founder it Phase Research Center, sangka organisasyon nga naga-estudyo ag naga-reseach angot sa damgo, sleep paralysis ag astral projection.
Ginsaysay ni Raduga nga nagbuhay it 30 minutos ro brain surgery.
Sangkiri nana raya nga ginpundo kat maduea-an imaw it maabung dugo apang ginpilit nana raya nga tapuson para mabutang nana ro electrode sa anang utok.
Natun-an nana ro pag-opera sa utok pinaagi sa pagtan-aw it mga brain surgery footage sa YouTube.
Mag-eowas kara, gin-eksperimentuhan man nana ro utok it karnero.
Suno kay Raduga, ro pag-implant it platinum and silicon electrode sa utok hay posibleng magtau it ikasarang nga kontrolon it sangka tawo ro mga nagakatabu sa anang damgo.
Matapos ro limang domingo nga operasyon, ginpabo-oe ni Raduga ro implant sa sangka ospital.
Samtang owa pa it nakikitang maeain nga side effects kay Raduga sa gin-obra nana nga operasyon sa kaugalingon, nagpaandam ro mga neurosurgeon ag doktor nga indi raya pagtuearon bangud nga posibleng maging epileptic ag atakehon it stroke ro maging epekto kara sa eawas.
