KALIBO, Aklan — Hugot eon ro ginapatuman nga seguridad sa sueod ag guwa it isla it Boracay sa nakataeanang pagbisita ni Pangueong Rodrigo Duterte hin-aga, bandang alas-3:00 it hapon, Nobyembre 8.
Kaibahan ro Department of Agrarian Reform (DAR), pagapangunahan it Pangueo ro pagpanupod it kapin sa 3.2 ektaryang eogta nga makit-an sa Barangay Manocmanoc, Boracay sa mga katutubong Ati, sangka pagkilaea kanda bilang mga kauna-uhahang naga-istar sa isla.’
Sa interview it Bombo Radyo, ginpahayag ni DAR Regional Director Stephen Leonides, nga kapin sa 44 nga pamilya ro pagataw-an it ap-at nga certificates of land ownership awards (CLOA).
Kaibahan pa sigon sa andang plano ro pagpaidaeom sa agricultural training sa mga katutubong benepisyaryo agud sanda eon ro maga-supply it mga tinuean-on ag iba pang pananom sa mga hotels ag restaurants sa isla.
Mag-eowas sa Boracay, kapin sa 200 ektarya pang eogta ro igapanupod sa iba pang mga banwa sa Aklan hin-aga.
Ginpaadaman man it ahensiya ro mga beneficiaries nga bawae nga ibaligya ukon parentahan ro eogta sa sueod it napueong dag-on bangud pwede raya nga bawion ag ita-o sa ibang mangunguma.
Nasayuran nga gin-insister ni Pangueong Duterte ro pagpanupod it eogta sa mga mangunguma pamaagi it land reform bangud agricultural land sigon ro isla.
