KALIBO, Aklan–Malinong apang masadya ro pagsug-aeaw sa bag-ong dag-on it mga pumueoyo sa island country nga Tonga.
Suno kay Bombo International Correspondent Merylen Tundag nga ro mga Tongan hay nagselebrar it New Year kaibahan ro andang pamilya kung siin may pagsaeo-saeo ag pangamuyo.
May mga handa man sigon sanda nga pagkaon kamana man nga nagapatigayun it pahampang gamit ro mga playing cards.
Apang, pag-abot sigon it 12 midnight naging malinong eon ro palibot bangud hugut nga ginabawae ro pagkriar it sangag sa nasambit nga nasyon kun adlaw it Dominggo bangud ginakabig raya bilang Holy Day.
Ginapasugtan eamang sigon ro pagpatukar it musika kun raya hay Christian ukon religious music.
Angot kara, ro mga Pinoy hay enjoy man kaibahan ro andang pamilya sa gin-organisa nga get together sa pagsug-aeaw sa bag-ong dag-on.
