Nahuya eon si Senator Ronald “Bato” dela Rosa rason nga nagdesisyon raya nga magbalik sa Senado, adlaw it Lunes.
Suno kana, nabatyagan nana nga kinahangean eon kara nga magbalik sa trabaho sa tunga it maabu nga mga nagakatabu.
Kaeakip sigon kara ro pagbaylo it liderato sa Senado kamana man ro impending convening it Senado sa impeachment court sa oras nga ma-transmit ro articles of impeachment sa Senado ag ro anang nabatyagan nga kahuya sa mga kababayan nga nagabatikos kana nga nagabinaton it sweldo maskin nga owa naga-trabaho.
Ro anang an-um nga buean nga pag-absent hay nag-umpisa kat gina-alegar ni Ombudsman Jesus Crispin Remulla nga nagpaguwa eon it warrant of arrest ro International Criminal Court (ICC) kontra kana may kaangtanan sa drug war ni former president Rodrigo Duterte.
Kasunod it anang pagbalik, ginkumpirma it ICC nga nag-issue ro tribunal it arrest warrant nga may petsang Nobyembre 6, 2025 para kay dela Rosa nga nagatindog nga hepe it Philippine National Police sa drug war it Duterte administration.
Samtang, gin-ako ni dela Rosa nga kinahangean nana nga magpanago matapos magbaton it impormasyon sa arrest warrant halin sa ICC.
Sa makaron hay magapabilin sa protective custody it Senado si Dela Rosa, kun sa siin, ginahueat sigon nanda ro Supreme Court decision matapos nga mag-file it mga petitions.
