National News——–Umatras eon sa Senatorial bid para sa May 9 elections si Deputy Speaker Rodante Marcoleta matapos ro ap-at nga buean nga pagpangampaniya sa nagkaeain-eain nga parte it Nasyon.
Sa sangka statement,gin-anunsiyo ni Marcoleta ro rason it anang pag-atras ag sambilog eon kara ro pagiging ulihi sa mga surveys.
Ginpasaeamatan man nana si Pangueong Rodrigo Duterte sa pagpabaskog it anang buot nga magpadaeaganan sa pagkasenador ag pagsalig para sa andang pag-endorso kaibahan ro PDO-Laban ag People’s Reform Party nga nag-adopt kana sa pagka-senatorial candidate.
Dugang pa ni Marcoleta nga indi nana malipatan ro ginpakita nga suporta it ginatos nga supporters ag volunteers nga nagpati sa anang adbokasiya para sa ikamayad it tanan.
Samtang, nagasalig imaw nga pagarespetuhon ro anang nanging desisyon.
