KALIBO, Aklan—Sangka silent protest ro ginkasa it mga boat operators agud nga ipaabot ro andang pagkontra sa ginaproponer nga Boracay bridge.
Suno kay Christine Hope Pagsuguiron, barangay kagawad it Caticlan, Malay nga bandang alas-8 it agahon hay nag-umpisa ro motorcade nga nag-umpisa sa barangay Caticlan ag naglibot sa barangay Poblacion kun sa siin nag agi sa munisipyo antes nga nagbalik sa tabon port.
Raya hay gin-organisa it Caticlan‐Boracay Transport Multi‐Purpose Cooperative ukon CBTMPC ukon asosasyon ag kooperatiba it mga boat operators ag boatman sa nasambit nga banwa .
Nag ugyon man ro iba pang toda ag pilang pribadong indibidwal.
Madumduman nga hugut nga ginapamalibaran it nasambit nga asosasyon ro plano nga pag-construct it tulay nga naga-konekta sa banwa it Malay patabok sa isla it Boracay bangud sa posibilidad nga maapektuhan ro andang pangabuhian.
Gina-insister it grupo nga owa pa sanda nakabawi halin sa andang gin utang sa pag upgrade it andang motorbanca halin sa kahoy paagto sa fiber glass sandig man sa mandu it Maritime Industry Authority (MARINA).
Mag-eowas kara, ginpahayag ni pagsuguiron nga ginapanan-aw nga maapektuhan man ro environment sa pagkasamad it mga coral reefs ukon marine eco-system sa pangkabilugan sa oras nga umpisahan ro major construction.
Dugang pa nga maduea an it kita ro mga nagapangunang pantalan sa nasambit nga banwa.
Ro proyekto hay sa idaeum it Public-Private Partnership ukon PPP Infrastructure Projects nga pagadumaeahan it san Miguel corporation.
Raya hay ginaboeobanta nga may pondo nga P4.6 billion .
