KALIBO, Aklan–Maabu ro gina-ekspektar it mga pumueoyo nga mabatian halin sa kauna-unahang State of the Nation Address (SONA) ni Pangueong Ferdinand “Bongbong” Marcos Jr. makaron nga adlaw.
Suno kay Atty. Plaridel Morania, sangka batikan nga abogado sa probinsya it Aklan nga ginaeauman nana nga maiplastar it maayos it pangueo ro anang mga plano ag hagna para sa pagsueong it nasyon.
Pila sigon sa mga dapat nga tutukan it administrasyon hay ro pandemya nga sambilog sa mga rason it pagka-eugmok it ekonomiya.
Dapat suno kana nga makaangkon it mabakod nga solusyon ro gobyerno agud nga makabangon ro mga Pilipino.
Mag-euwas kara, kinahang-ean man nga matutukan ro inflation ukon pagtinaas it presyo it mga baeak-eon nga haeos indi eon masarangan it mga ordinaryong pumueoyo.
Dugang pa ni Atty. Morania nga dapat matapna eon ro pag-eapnaag it korapsyon sa mga ahensya it gobyerno bangud sambilog man raya sa nagasab-eag sa pag-umwad it nasyon.
Ro sektor sigon it agrikultura eabi eon ro food security hay dapat nga mataw-an it prayoridad para malikawan ro pag-angkon it krisis sa pagkaon.
Kamana man ro edukasyon para masiguro nga magkantigo ro mga estudyante ag makasunod sa mga leksyon.
