KALIBO, Aklan—Nagapangibabaw makaron ro “spirit of fear” sa bilog nga nasyon it South Korea.
Raya hay suno kay Bombo International Correspondent Peter Baltazar Teodosio, tubong Brgy. Jugas, New Washington apang presenteng pastor sa sangka simbahan sa Incheon City, Seoul, South Korea bangud sa madasig nga pagkalhit it coronavirus disease (COVID)-19.
Ginpahayag dugang nga ro mga tumueo-o sa nasambitang lugar hay ginagamitan anay it thermal scanner antes makasueod sa simbahan samtang ro iba hay naka-monitor eon lang sa facebook it misa.
Suno pa kay Teodosio, kaeabanan sa mga construction worker sa South Korea hay mga Chinese kon sa siin sanda ro ginapatihan nga nagdaea it virus matapos nga nagbakasyon ro mga raya sa China.
Ro iba sigon kanda hay ginhold sa immigration apang matapos ro pilang pagpangusisa hay gilayon man sanda nga ginpasueod sa nasyon.
Samtang sa pihak nga parte, ginpadumdom man ni Teodosio ro publiko kaangot sa importansya it ash Wednesday ukon miyerkules badlis kahapon nga adlaw.
Suno kana, raya eon ro umpisa it lenten season ag ginapadumdom kara ro tanan nga magbalik-loob sa Diyos ag ipangamuyo ro nagakatabo nga disaster sa bilog nga kalibutan.
