KALIBO, Aklan—Nag-abot eon Singapore si Sri Lanka President Gotabaya Rajapaksa kabi-i bilang sangka private visitor ukon turista.
Raya ro ginpahayag ni Bombo International Correspondent Mercy Cacan it Singapore.
Suno kana nga ginbaton it gobyerno it Singapore ro dating prime minister matapos nga maglayas raya sa andang nasyon kasunod it maeapnagon nga protesta idtu bangud sa naexperiensiyahan nga krisis sa ekonomiya.
Kaibahan sigon kara ro anang asawang si Ioma ag daywang bodyguards halin sa Maldives nga una nanda nga gin-agtunan kan-o eamang matapos nga magpaeagyo.
Ginpahayag ni Cacan nga nauna eon nga ginpamilit it Foreign Ministry it Singapore nga ginpasugtan nanda nga makasueod si Rajapaksa sa andang nasyon para sa sangka “private visit”.
Apang owa sigon it napabalita kon hasta hin-uno raya nga magabuhay sa nasambit nga nasyon kamana man ro hotel ukon baeay nga anang ginadayunan.
Gindugang pa ni Cacan nga sang adlaw antes ro pag-abot it dating lider hay ginpaandaman ro Sri Lankan nga nakabase sa Singapore nga bawae ro magpatigayon it protesta.
Nagakasubo sigon ag gusto kunta it pilang Sri Lankan nga abangan ro anang pag-abot agud nga ipakita ro andang kaakig bangud sa gintuga kara nga krisis sa Sri Lanka.
Madumduman nga nagsumite eon it anang letter of resignation si Rajapaksa kay Parliament Speaker Mahinda Abeywardena matapos mag-abot sa Singapore apang ginakwestiyon bangud nga ginpaagi eamang raya sa email ag owa it hard copy.
