KALIBO, Aklan—Padayun sa pagtao it calamity loan ro Social Security System (SSS-Aklan) para sa mga empleyado nga apektado it padayun nga pagpanaeasa it Coronavirus Disease 2019 ukon COVID-19 pandemic.
Suno kay Angelo Blancaver it SSS-Aklan, kaibahan sa mga kwalipikado nga pwedeng mag-avail it loan hay ro mga self-employed, voluntary ag employed member kamana man ro mga kabulig sa baeay provided nga naka-contribute ro mga raya it 36 months.
Gina-engganyo man ni Blancaver ro mga gustong mag-apply it loan nga mag-register ukon log in anay online sa www.sss.com.ph para sa andang transaksyon.
Raya hay sambilog sa euwas nga pamaagi para makalikaw sa pagkalhit it COVID-19 kamana man nga masunod ro pilang minimum health protocols nga ginpatpat it health department.
Kaangot kara, may ginbutang man sigon sanda nga mga drop box sa guwa it andang opisina para dikato i-submit ro mga application ag hotline nga posibleng tawagan para sa pilang pangutana.
Samtang, sa pihak nga parte, ginpabutyag man ni Blancaver nga gin-extend ro deadline sa pagbayad it contribution it mga self-employed ag voluntary nga miyembro it ahensya tuga it pandemya.
