KALIBO, Aklan—Diretsahan nga ginsabat ni Dr. Joyce Morales, Public School District Supervisor it District of Madalag ro mga nagkaeain-eain nga isyu nga ginahaboy kana it mga manugturo sa nasambit nga banwa.
Ginpamilit ni Dr. Morales nga nagpasakop sanda sa “kahayag sa banwa” agud nga maipakita ro andang partisipasyon ag kooperasyon sa local government unit eabi pa ag naga-atubang ro Madalag Elementary School sa andang public plaza.
Tuyo sigon kara nga mapasadya man ro mga pumueuyu sa mga palamuti nga andang igabutang agud nga mabatyagan ro espiritu it paskwa.
Ginpamalibaran man nana ro alegasyon nga mga luma nga iwag ag Christmas lights ro gingamit bangud nga kahapon eamang sanda nakabakae kara halin sa 100 pesos nga kontribusyon nga may nagakaigo nga resibo kun sa siin haum man nana nga ikapaathag sa tanan ro expenses.
Nauna eon nga gina-insister it mga manugturo nga medyu sobra-sobra man ro 5,000 to 7,000 pesos nga gina-alegar nga nakolekta para sa Christmas lights.
Sa isyu man it compulsory nga baeayran, aminado imaw nga nagpanukot sanda it kontribusyon para sa district meet.
May nakataeana sigon kara nga pondo ro LGU apang kueang rason nga nag-koleksyon sanda it aeamutan sa mga teachers nga nag-agi sa mga school heads.
