KALIBO, Aklan—Kapin sa tatlong ka baeay ag sangka bodega nga may sueod nga masobra sa sang gatos ka sakong paeay ro nadaeasa it kaeayo sa nag-eontad nga sunog sa Sitio Tugbungan, Brgy. Caano, Kalibo bandang alas-7:40 it gabie.
Ro nasambit nga mga panimaeay hay human sa mix materials rason nga madasig nga nagkalhit ro kaeayo.
Ginpahayag it mga residente sa lugar nga gulpi eamang ro pagdabdab it kaeayo nga posibleng naghalin sa baeay nga uwa it tawo bangud nga ro nagapanag-iya kara hay nagguwa agud nga magbakae kunta it suea ag sa andang pagbalik hay ginaeamon eon it kaeayo ro andang ginaistaran.
Sa pagresponde it Bureau of Fire Protection ukon BFP Kalibo hay naabutan nanda sa area nga mabahoe eon ro kaeayo ag madasig nga ginaeamon kara ro mga apektadong panimaeay.
Sa makaron hay nagapadayon pa ro imbestigasyon it BFP sa posibleng gintunaan it sunog.
Samtang sa pihak nga parte, insigida man nga nagpaabot it relief assistance ukon food boxes ro lokal nga gobyerno sa mga apektadong pamilya.
