KALIBO, Aklan—Mas pang naglobo ro numero it mga turista sa isla it Boracay makaron.
Suno kay Felix Delos Santos it Malay Tourism Office nga dere-deretso ro pag-aeabutan it mga bakasyunista matapos nga ginbo-oe eon sa mga travel requirements ro RT-PCR test result sa mga bakunadong turista umpisa ko Nobyembre 16.
Natigayon eon man sigon nga maayos it provincial government ro reklamo it mga turista nga delay nga pagpaguwa it QR codes pinaagi sa pagbo-oe ni Aklan governor Florencio Miraflores it dugang nga mga tawuhan para sa validating team agud nga masabat ro nagataas nga tourist traffic.
Mag-eowas kara, nagdugang it mga telepono ag computers para sa mga naga-inquire.
Sa pihak nga parte, ginpaabot ni delos santos nga kapin sa 42,750 eon ro tourist arrivals umpisa Nobyembre 1 hasta 22 ukon may average nga 1,500 hasta 2,500 nga bisita kada adlaw kun sa siin haeos katunga sa mga raya hay naghalin sa National Capital Region.
Sa pihak nga parte, engkaso nga buksan eon ro Boracay sa international tourist, ginpahayag ni delos santos nga plano it provincial government nga iseparar ro aeagyan it mga residente ag trabahador kun sa siin maga-agi sanda sa pantalan sa may reclamation area samtang ro mga turista hay maga-agi sa caticlan jetty port ukon sa mga private ports it mga mabahoe nga hotels ag resorts agud nga malikawan ro pagdueutdutan.
Kaibahan pa sa gin-istoryahan sa pueong kaibahan ro mga tourism officials ro pagpabaskog it technical working group agud nga masiguro nga mabantayan ro hugut nga pagpatuman it minimum health protocols sa isla partikular ro social distancing.
Dugang pa kara ro pag required sa tanan nga mga accomodation establishments nga magtaeana it health and safety officer nga magapadumdum sa mga turista sa mga dapat nga obrahon.
Masobra sa 100% eon it mga tourism workers ro bakunado kamana man ro mga eligible residents nga naga abot sa 103.14%.
