KALIBO, Aklan—Naga abot eon sa 1.5 milyon ro numero it mga turista nga nagadagsa sa isla it Boracay umpisa enero hasta ko buean it Agosto it makaron nga dag-on.
Base sa datos, ko buean it Agosto hay nakalista it 138,819 nga domestic tourists; 1,780 ro mga overseas Filipinos ag 37,990 ro mga dumueuong nga turista ukon may kabilugan nga 178,589.
Raya hay mas mataas it 11% kumpara sa kaparehong period ko nagtaliwan nga dag-on.
Suno kay Malay municipal tourism officer Felix Delos Santos nga ro nasambit nga numero it tourist arrivals hay kapareho eon sa pre-pandemic level nga mabahoe nga bulig sa padayun nga pagbangon it industriya it turismo ag lokal nga ekonomiya.
Kumpiyansa imaw nga sa buean it Nobyembre hay maabot nanda ro target nga tourist arrivals nga 1.8 milyon ag ginaeauman nga sa pagtapos it 2023 hay maka abot pa it 2 milyon ukon masobra pa.
Nagapatigayon sigon sanda it nagkaeain-eain nga aktibidad nga may kaangtanan sa turismo sa nagtaliwan nga mga binuea agud nga mas pang maka engganyo it mga turista nga magabisita sa isla.
Sa kamatuoran suno kana hay naging mabungahon ro andang pagpasakop sa bag-o eamang natapos nga 34th Philippine travel mart, ro pinakamabahoe ag pinakamabuhay nga running expo sa nasyon nga ginpatigayon sa Metro Manila.
Samtang, gindugang pa ni Delos Santos nga owa naka apekto sa pagbuhos it mga bisita ro habagat season sa isla.
Sa pihak nga parte, ro South Koreans gihapon suno kana ro nagapanguna sa kaabuon it tourist arrivals sa Boracay.
Sinundan raya it China,ag Taiwan bangud sa mga direct flights.
Nakasueod man ro Estados Unidos, Japan, Australia, United Kingdom, Germany, Russia, ag France sa may pinakamaabu nga arrival sa isla.
