KALIBO, Aklan—Nag-abot eon sa 119,222 ro mga turistang nagbakasyon sa Isla it Boracay umpisa Enero 1 hasta 21 it makaron nga dag-on.
Suno kay Felix Delos Santos it Malay Municipal Tourism Office nga base sa andang record, padayon ro pagbuhos it mga bisita sa isla nga naga-average sa 5,000 to 6,000 kada adlaw.
Sa nasambit nga numero, ro foreign tourists hay nag-abot sa 23,088 nga indikasyon nga amat-amat eon ro pagbalik it mga dumueuong nga turista sa isla.
Mabahoe nga bulig sigon ro pagsueod it mga international flights halin sa Korea.
Mag-eowas kara, ro paghaeuga sa mga requirements it mga biyahero ag ro mga events sa Boracay ag mainland kapareho it ati-atihan festival sa banwa it Kalibo.
Target nanda nga mapaeapit ro tourist arrivals sa nailista ko pre-pandemic level nga kapin sa 200,000 visitors per month.
Sa pihak nga parte, ginklaru ni Delos Santos nga kada tatlong domingo hay may magatugpa nga chartered flight halin sa Taiwan sa Godofredo P. Ramos airport sa banwa it Malay.
Naging positibo sigon ro feedback kara it mga Taiwanese tourists bangud nga naging matag-od ro andang travel time paagto sa isla it Boracay.
