KALIBO, Aklan—Kumpiyansa ro Malay Municipal Tourism Office nga mas pang magataas ro tourist arrivals sa isla it Boracay sa katapusan it Nobyembre makaron nga ginaeauman nga mabakunahan eon ro syento porsiyento it mga residente ag tourism workers kontra sa COVID-19.
Suno kay Felix Delos Santos, Chief Tourism Operations Officer nga nag-abot eon sa 92.2% it tourism workers ro nabakunahan sa isla, samtang 94.59% sa eligible population.
Ginaeauman nga mas pang maga abu ro magabukas nga tourism establishments ag maibalik ro mga naduea nga trabaho ag pangaabuhian.
Madumduman nga nauna eon nga gin-anunsyo it provincial government it Aklan, ro posibilidad nga boe-on eon ro negative RT-PCR test requirement para sa fully vaccinated tourists halin sa guwa it isla it panay ag guimaras basta nga makapakita it andang vaccination certificate.
Sigidas man sigon ro preparasyon makaron it department of tourism sa pagbaton it mga dumueuong nga turista ag ginahueat eon lang ro go signal it gobyerno.
Sa makaron hay haeos 292 eon nga mga accommodation establishments ro naga-operate sa boracay nga gin-isyuhan it Certificate of Authority to Operate ukon CAO it DoT.
