KALIBO, Aklan–Nagtaas it haeos 50 porsyento ro nailistang tourists arrival sa isla it Boracay ko buean it Marso.
Raya hay matapos nga makalista ro Malay Tourism Office it kabilugan nga 150,597 turista umpisa Marso 1 hasta 31 nga mas mataas kung igakumpara sa masobra 80,000 ko buean it Pebero.
Suno kay Malay Tourism Officer Felix Delos Santos nga maskin paano hay amat-amat eon nga nabatyagan ro uman nga pagbangon it industriya it turismo sa Boracay.
Ro nasambit nga numero suno kana hay haeos 70 hasta 80 porsyento it tourists arrival it pre-pandemic period para sa buean it Marso nga naga-abot sa masobra 200,000.
Ginpahayag dugang nga ro Amerika ro may pinakamataas nga numero it foreign tourists nga ginasundan it United Kingdom, Germany, Canada ag maabo nga iba pa.
Nagapabilin sigon nga owa it direct international flight sa Kalibo International Airport rason nga ro mga dumueo-o hay naga-agi pa sa Metro Manila.
Umpisa suno kana nga haeugaan ro restrictions sa isla ag buksan ro borders it Pilipinas para sa mga foreigners ko Pebrero 10, nakalista sanda it 4,000 hasta 6,000 nga turista kada adlaw.
