KALIBO, Aklan — Una eon sa mayad nga kondisyon ro tatlong katawo matapos nga bungguan it trak it Municipal Disaster Risk Reduction and Management Office (MDRRMO)-Batan ro andang ginasakyan nga tricycle, Martes it hapon sa national highway nga sakop it Sitio Bangbang, Brgy. Calizo, Balete.
Ro mga biktima nga insigidang gindaea sa sangka pribadong ospital sa Kalibo hay nakilaea kanday Leo Casas, 28, it Sitio Sauragan, Calizo; mag-amang Jose Pelayo, 48, ag Josh Miguel Pelayo, 7, parehong residente it Sitio Agupanga, Brgy. Feliciano sa nasambit nga banwa.
Samtang, nakilaea ro driver it trak nga si Mervin Placer, 58, residente it Brgy. Poblacion, Batan nga insigidang napahilway matapos nga makaangkon it amicable settlement.
Base sa imbestigasyon, parehong paagto sa direksyon it Balete ro daywang saeakyan kat gulpi nga nagpundo ro tricycle agud nga pasakyon ro sambilog nanda nga kaibahan rason nga naaeang-aeangan ro kasunod nga trak ag nabungguan raya nga naging rason it pagkatumba.
Nasayuran nga ro mga biktima hay nagapintura it karsada sa nasambit nga lugar.
