KALIBO, Aklan—Kasado eon ro tricycle route plan it lokal nga gobyerno it Kalibo.
Sa ginpatigayon nga kauna-unahan nga pueong it tricycle inter-agency task force, ginpahayag ni SB member Matt Aaron Guzman, chairman it committee on transportation nga kaeakip eon ro andang gin-draft nga tricycle route plan sa bag-ong traffic code it Kalibo.
Sa oras suno kana nga mapirmahan raya ni Kalibo mayor Emerson Lachica ag maaprubahan it Sangguniang Panlalawigan hay magapatigayon sanda it hugut nga information dissimenation.
Ginaeauman nga sa masunod nga daywang dag-on hay eubusan eon nga igabawae ro pag-agi it mga tricycle sa national highways bilang pagsunod sa Memorandum Circular No. 2020-036 it Department of Interior and Local Government ukon DILG, kun sa siin, pagalimitahan ro mga tricycles ag pedicabs sa mga barangay roads.
Gindugang pa ni Guzman nga ro kueang eon lang sa makaron hay ro road signages, apang ginpaabot sigon it Department of Public Works and Highways ukon DPWH-Aklan nga may nakataeana eon nga pondo para kara.
Hugut man sigon makaron nga pagabantayan ro mga naga-overspeeding nga saeakyan sa mga national highway nga may limit eamang sa 40 kph.
Ginamanduan man sigon ro mga barangay officials nga hugut nga ipatuman ro road clearing sa andang nasakupan partikular ro mga naga-parking nga saeakyan sa kilid it national highways.
