KALIBO, Aklan—Nahimuan eon it remedyo it Department of Public Works and Highways ukon DPWH Aklan nga maayos ro tulay nga nagakonekta sa Barangay Albasan ag Barangay Camanci Sur, Numancia nga nauna eon nga temporaryong ginpasarado bangud sa gabok eon raya ag delikado para sa mga nagatabok.
Suno kay Albasan Punong Barangay Royden Perlas, mas matibay ro ginbutang nga kahoy it ahensya bangud nga may suporta raya nga tubo sa idaeom.
Sa makaron suno kana hay maagyan eon ro tulay it mga motorsiklo ag mabahoe ro andang pagpasaeamat bangud nga mabahoe nga bulig sa mga umaeagi eabi eon sa mga estudyante ro uman nga pagbukas it nasambit nga tulay.
Nagaeaum si Punong Barangay Perlas nga matuman ro ginhambae ni Engr. Joey Ureta, maintenance head it DPWH Aklan nga mataw-an it pondo ro Albasan-Camansi Sur Bridge agud nga daeayon nga matapos ro proyekto sa mas matibay nga daean para sa kasoehayan it mga pumueoyo.
Madumduman nga ginpahayag ni Engr. Ureta nga may gintaeana nga budget nga nagaabot sa P10 milyon pesos para sa nasambit nga proyekto nga posibleng maumpisahan ro construction sa masunod nga dag-on.
