Kontrolado eon ro langis nga tumagas halin sa gina-salvage nga power barge sa shipyard it Metallica Shipbuilding/Breaking Company nga nahamtang sa may bahin it Lagatik River sa Brgy. Polo, New Washington.
Suno kay Engr. Jonathan Salvador, tag-ana it nasambit nga shipyard nga owa eon it dapat nga ikabaeaka ro mga residente sa natabu nga pagtagas it langis bangud nga nalimpyuhan eon raya sa bulig it mga rumespondeng tawuhan it Bureau of Fisheries and Aquatic Resources ukon BFAR, Department of Agriculture, Philippine Coast Guard, Local Government Unit ukon LGU-New Washington, Barangay Council it Pinamuk-an ag iba pang natungdan nga ahensiya it gobyerno kamana man nga naka-monitor ro tag-ana mismo it barko.
Gintinguhaan sigon nanda nga indi eon magkalhit ro langis sa main river ag sa mga tributaries kara.
Sa makaron hay padayun ro andang pag-recover sa mga nagtagas nga langis sa pond sa sueod it andang shipyard.
Ginpasiguro man nana nga owa it naging grabeng kahalitan sa suba ro oil leak bangud nga insigida nanda nga naaksyunan ro problema pinaagi sa pagbutang it oil spill boom ag absorbent booms it PCG.
Ginaboeobanta nga sa masunod nga mga inadlaw hay matigayon nanda nga mahimos ro nagkalhit nga langis.
Ginpaathag nga raya Hay bukon it kapareho it bunker fuel nga nagatig-a.
Nasayuran nga ro 43 anyos nga vessel nga nakadungka sa andang shipyard hay imaw man ro nasunog ro nagtaliwan nga buean it pebrero.
Nakataeana man nga magpaguwa it post evaluation report ro PCG angot sa oil spill.
Nauna kara, nagpaabot it reklamo sa Bombo Radyo ro mga mangingisda ag residente sa lugar matapos nga gina-alegar nga umabot eon ro oil spill sa mga fish cages nga nahamtang sa suba nga sakop it Brgy. Pinamuk-an kon sa siin may nataeopangdan nga nagkaeamatay nga mga isda.
