KALIBO, Aklan — Naeumos ro sangka Filipino-Chinese samtang nga nagapatigayon it snorkeling activity sa Crocodile Island sa Sitio Tambisaan, Brgy. Manocmanoc, Boracay.
Patay eon kat maka-abot sa sangka ospital sa isla ro 40-anyos nga biktima nga owa eon ginpangaeanan base sa hinyu it anang pamilya nga residente it Dapitan St. Lourdes, Quezon, City.
Base sa report it Philippine Coast Guard (PCG)-Aklan, naabutan eon lang it mga rumespondeng miyembro it Municipal Disaster Risk Reduction and Management Office (MDRRMO)-Malay ro biktima nga naga-eutaw ag nagakueob sa tubi.
Nadaea pa raya sa ospital, apang gindeklarang patay eon it attending physician.
Sa imbestigasyon it PCG-Aklan, bandang alas-7:00 it agahon kat mag-snorkeling ro biktima kaibahan ro anang asawa, apang pagkataliwan it sang oras hay nasapwan eon lang raya nga owa eon it alintro.
Ginatumod pa sa makaron kon may ibang sakit ro biktima nga posibleng rason it anang pagkamatay.
Nakataeana nga pagadaehon ro bangkay it biktima makaron nga adlaw sa Metro Manila.
