KALIBO, Aklan—Uman nga iga-showcase it mga talentadong designer ro andang mga obra sa konseptong Piña, Ati-atihan ag vibrant Kalibo kon sa siin himo sa ginapabugae nga piña fiber ro iba nga mga igarampa nga eambong it mga magapasakop nga modelo.
Masobra sa 170 ka mga designs ro ginaeauman nga makit-an sa fashion show in collaboration with Local Government Unit of Kalibo.
Suno kay Phats Tambong, president it Fashion and Design Council of Aklan Philippines ag vice chairman it Ati-Atihan Fashion Festival nga ro nasambit nga aktibidad hay igapatigayon sa Enero 11 sa Pook Jetty Port sa Brgy. Pook, Kalibo.
Kapin sa 14 ka mga designer ro nagpasakop kon sa siin tatlo sa mga raya hay international nga nakabase pa sa Dubai, UAE ag London, United Kingdom samtang ro iba hay nagapasuksok sa andang mga designs sa mga sikat nga artista ag modelo.
Unang gintukod ro organisasyon ag nagpatigayon it aktibidad ko 2019 apang nakaangkon it pandemya rason nga ginbalik raya ko 2023 ag nagpadayon hasta it 2024.
Makaron nga dag-on suno kana hay mas ginpasangkad pa nanda raya kon sa siin makaeaum ro mga tumaean-aw it bag-o, manami ag mas kaabang-abang nga obra it mga talentadong designers.
Sa makaron suno kay Tambong hay una eon sanda sa finishing touch it tanan nga preparasyon para maabot ro expectation it mga ginaeauman nga tumaean-aw ag iba pang bisita it nasambit nga Ati-Atihan Fashion Festival.
Sa mga gustong masaksihan ro tumaeagsahon nga aktibidad hay pwedeng makipag-angot sa andang taeatapan para makabakae it tickets.
