KALIBO, Aklan — Naging maayos ag owa it anuman nga tensyon ro pagpungko bilang bag-ong mayor ni Libacao 1st Sangguniang Bayan member John Randy “Bagto” Zapata, agahon it Miyerkules, Mayo 28, 2025.
Sa interview it Bombo Radyo, ginkumpirma nana nga ko hapon it Martes hay ginpa-agto sanda sa opisina it Department of the Interior and Local Government (DILG)-Aklan agud nga pormal nga magpanumpa sa pwesto bilang bag-ong mayor kaibahan si 2nd Sangguniang Bayan member Dexter Cabes nga magapungko mat-a bilang bise alkalde.
Nasayuran nga gin-aprubahan it Ombudsman ro pagsibak sa pwesto sa mag-amang Mayor Charito Navarosa ag Vice Mayor Vincent Navarosa bangud sa pag-eabag sa Republic Act 6713 ukon Code of Conduct and Ethical Standards for Public Officials and Employees.
Raya hay nag-ugat sa reklamo it contractor it sangka pribadong kompaniya kon sa siin ginapahayag nga antes sigon ro election hay may dismissal order eon kontra kanda apang makaron eamang raya gin-serbe kon sa siin ro mag-ama hay uman nga nagdaog ko nagtaliwan nga May 12 national and local election.
Sa pihak nga parte, ginpahayag ni Mayor Zapata nga pagahueaton eon lang nanda ro resolusyon maghalin sa Commission on Elections ukon Comelec kon sin-o ro magabueos kanda sa pwesto sa Hunyo 30 sa atubang it disqualification case nga ginapangatubang it mag-amang Navarosa bangud sa andang kaso sa Ombudsman.
Apang engkaso suno kana nga indi pa mag-abot ro desisyon sa nasambit nga petsa, igapatuman ro ginatawag nga rule of succession sa Hulyo 1.
Raya hay nagakahueugan nga ro nagdaog nga 1st ag 2nd Sangguniang Bayan members ro magabueos kanda sa pwesto.
