KALIBO, Aklan — Nagapangatubang makaron sa kaso ro sangka motorcycle rider nga nakabangga-patay sa kaparehong rider ko Lunes it gabi-i sa karsadahon nga sakop it Brgy. Mabilo, Kalibo.
Ginpasakaan si Tomas Tibulan, 33, residente it Brgy. Aglucay, Makato ag presenteng naga-istar sa Ureta Road, Brgy. Andagao, Kalibo it kasong reckless imprudence resulting to homicide sa Aklan Prosecutor’s Office.
Engkasong indi makabayad it piyansa nga P75,000, iga-remit si Tibulan sa Aklan Rehabilitation Center.
Nasayuran nga namatay samtang ginabueong sa sangka pribadong ospital ro biktima nga si Richard Coronado, 36, residente it Sitio Saugan, Brgy. Tambak, New Washington bangud sa naangkon nga nina sa eawas ag ueo matapos nga bumaliktad ro anang motorsiklo.
Sa imbestigasyon it kapulisan, sakay it Honda TMX si Coronado pauli sa Brgy. Tambak, New Washington samtang ro direksyon man ni Tibulan sakay it anang Motorstar hay paagto sa Kalibo nga naging rason it head-on collision it daywang motorsiklo.
Ginasugid nga si Tibulan hay una sa impluwensiya it makahieilong nga ilimnon ag owa it drivers license.
Insigidang gindaea ro daywa sa provincial hospital, apang ginsaylo si Coronado sa private hospital bangud sa kritikal nga kondisyon, nga kon sa siin, ko ulihi binawian it hueam nga kabuhi.
