Nagpamalibad ro US Department of Justice nga magtao it komento angot sa posibleng extradition ni Kingdom of Jesus Christ founder Apollo Quiboloy.
Suno kay US DOJ spokesperson ag senior communications adviser for international law Nicole Navas Oxman, sambilog sa mga polisiya it mismong ahensya hay ro indi pagtao it komento sa mga extradition-related matter hastang ro sangka defendant hay idto eon mismo sa US.
Si Quiboloy hay nagapangatubang sa patong-patong nga kaso sa US kaparehas it sex ag human trafficking, fraud, ag money laundering. Base sa report it US DOJ, halin ko 2002 hastat dag-ong 2018 hay pumipili sigon ro mga lider it KOJC it mga dalagitang edad 12 hasta sa mga daeaga nga may edad 25 agod nga magsirbing mga pastoral o mga personal assistant ni Quiboloy.
Parte it serbesyo ko mga raya hay ro pagpahaom it pagkaon ni Quiboloy, maglimpyo sa anang baeay, magmasahe kana, ag ibhan ro akusadong pastor, siinman raya bumiyahe.
Apang mag eowas kara hay pinipilit man sigon sanda nga panghimuslan it pastor kung sa siin may una pa nga schedule ro kada pastoral. Ro mismong schedule, suno sa US DOJ, hay tinatawag nga ‘night duty’.
Base pa sa report it ahensiya, para mapilit ro mga dalagita nga maghimo it sensitibong ueobrahon sa pastor hay ginahambae sigon it mga church administrator nga raya hay it Diyos samtang ginapa-eag man ro mga raya kung indi sanda magsugot.
