Nakaangkon it mahaba ag sensitibong pagpueong sanday US Secretary of State Marco Rubio ag Pope Leo.
Natabu ro pueong sa tunga it tensyon tuga it mga pauman-uman nga kritisismo ni Pangueong Donald Trump kontra sa Santo Papa angot sa giyera sa Iran.
Nagbuhay ro andang pueong it kapin sa daywa ag tunga sa oras sa Vatican, kaibahan ro pakikipag-istorya kay Pope Leo ag mga senior Vatican officials kapareho ni Cardinal Pietro Parolin.
Si Pope Leo, ro kauna-unahang Amerikanong Santo Papa, nga naging kritiko it US-Israeli war sa Iran ag mga anti-immigration policies it administrasyong Trump, nga nagatueod kay Trump nga pauman-uman imaw nga batikuson.
Sa pihak kara, ginpahayag it Santo Papa nga padayun nana nga igapakalhit ro mensahe it kalinong it Kristiyanismo ag hugut nga ginpamalibaran ro nuclear weapons, sandig sa mandu it Simbahang Katoliko.
Samtang, ginpahayag ni Polish Prime Minister Donald Tusk, nga nakipagkita man kay Leo, adlaw it Huwebes, nga ro andang topiko hay nakasentro sa pagpabaskog it pangkalibutanon nga kooperasyon ag pagtau it pageaum sa kalibutan.
Suno sa US ambassador sa Holy See, ro pag-istorya nanday Rubio ag Pope Leo hay ginaeauman nga magiging “prangka.”
Si Rubio, nga sangka Katoliko man hay magapabilin sa Roma it daywang adlaw ag makikipagkita man sa Italian Prime Minister Giorgia Meloni, nga nagasuporta kay Pope Leo kontra sa mga batikos ni Trump.
