MADALAG, Aklan—Nagdihon it anang resignation si Hon. Al Dindo Gubatina bilang bise alkalde it banwa it Madalag.
Bangud kara, si senior sangguniang bayan member Jessie Tumaca ro magabueos sa anang pagaaywanan nga pwesto umpisa sa Abril 1, 2025.
Ginpahayag ni vice mayor Gubatina nga pinal eon ro anang desisyon nga magpanaog sa pwesto maskin nga nagdihon pa imaw it anang certificate of candidacy para sa midterm election 2025 sa buean it Mayo.
Ginpaathag kara nga gusto eon nana nga makaibahan ro anang pamilya nga idto makaron sa United States of America ag kuntento eon man imaw sa mga dinag-on nga anang pagpanerbisyo sa mga pumueoyo it banwa it Madalag.
Suno pa sa bise alkalde, tyempo eon man agud nga magpabilin imaw sa eoyo it anang bilog nga pamilya kamana man agud nga maka-attend it graduation it anang onga.
Bangud sa nagaka-edad eon, mas gusto nana nga mag-enjoy kaibahan ro anang pamilya.
Kasunod it anang pagdihon it resignation hay ro nakataeana man kara nga pagwidraw it anang kandidatura sa Commission on Election ukon Comelec.
