KALIBO, Aklan — Gin-aresto it kapulisan ro sangka 27-anyos nga vlogger sa banwa it Tangalan bangud sa serye it bomb threat sa nagkaeain-eain nga mga eskwelahan sa probinsiya partikular sa banwa it Kalibo.
Ro suspek nga kilaea sa alyas nga “Vans,” residente it Sitio Centro, Brgy. Tagas, Tangalan hay naaresto, agahon it Miyerkules, Abril 15 pinaagi sa warrant nga ginpaguwa it Aklan Regional Trial Court.
Madumduman nga umpisa ko nagtaliwan nga dag-on hasta sa unang parte it 2026 hay padayun nga nakakabaton it paeag it pagpamomba ro mga eskwelahan pinaagi sa sangka online messaging app.
Natumod it mga awtoridad ro suspek sa anang naka-rehistrong numero it SIM card nga gingamit sa anang pagpadaea it bomb threat.
Sa ginpatigayon nga operasyon, narekober sa anang posisyon ag kontrol ro sangka unit it Samsung A02s nga cellphone kaibahan ro SIM card nga nakarehistro man sa anang pangaean.
Nakataeanang paga-usisaon it Regional Anti-Cybercrime Unit 6- PNP Anti Cybercrime Group ro mga narekober nga ebidensiya.
