BALETE, Aklan—Wasak ro windshield ag yupi ro iba pang parte it sangka wing van matapos nga sumunggab sa ap-at ka mga poste sa national highway nga sakop it Brgy. Bangbang sa banwa it Balete bandang alas-11:30 it agahon, adlaw it Lunes.
Suno kay P/Master Sgt. Jameo Mondia, imbestigador it Balete Municipal Police Station, halin sa banwa it Kalibo ro behikulo nga ginamaneho it eaeaking driver nga taga-Calatrava, Negros Occidental kat gulpi eamang nga naglock ro anang manibela samtang ginabaybay ro nasambit nga lugar.
Nakit-an sigon ro mahaba nga scratch sa karsada nga patimaan nga nag-apply it preno ro driver apang inde nana maeobag ro manibela rason nga sumunggab raya sa ap-at ka mga poste nga ginakabitan it mga cable ag telephone wire.
Maswerte eamang suno kana nga uwa nagdiretso sa banglid ro saeakyan bangud sa maugan eon raya ag ag uwa it karga.
Dugang pa ni P/Master Sgt. nga madanlog ro karsadahon ko nasambit nga oras bangud sa pagbuhos it mabaskog nga uean.
Sa pihak kara, uwa man it naangkon nga kasakitan ukon anuman nga injury ro driver it wing van.
Samtang sa pihak nga parte, ginpadumdom ni P/Master Sgt. Mondia ro mga byahero nga perming magdahan ag magpokus gid sa karsada kon nagamaneho.
Ro banwa it Balete suno kana hay maabong ginakabig nga accident prone area bangud sa mga paeosobon, patakason ag pakurbadang karsada nga takaw-aksidente sa mga motorista ag byahero.
