Nagpaabot it pakikisimpatiya ro lokal nga gobyerno it Zamboanga City angot sa natabu nga insidente it pagpamaril sa sambilog sa mga kilaeang eskwelahan sa siyudad.
Suno sa LGU-Zamboanga City, nakikipag-angot eon sanda sa pamunuan it Ateneo de Zamboanga University, Zamboanga City Police Office (ZCPO), ag sa iba pang mga natungdan nga awtoridad agud maaksyunan eagi ro hitabu.
Ginpasiguro man kara sa publiko nga kontrolado eon ro sitwasyon ag naipatuman ro mga nagakaigo nga tikang sa seguridad, bangud nga nagapabilin nga pinakamataas nga prayoridad ro kaeowasan it mga estudyante, manugturo, ag bilog nga komunidad.
Kadungan kara, naghinyu ro mga awtoridad sa tanan nga magpabilin nga kalmado, maging alerto, ag maging responsable pinaagi sa indi pagpakalhit it mga bukon it beripikadong impormasyon, tsismis, litrato ukon video nga pwedeng magtuga it kahadlok ukon maka-disturbo sa imbestigasyon it kapulisn.
Daywang estudyante ro namatay sa school shooting incident, agahon it Martes, Agosto 18, kaibahan ro estudyanteng gina alegar nga responsable sa insidente.
Base sa paunang impormasyon, nakasueod sa eskwelahan ro suspek nga may daeang high-powered firearm ag .45 caliber pistol.
Makita sa video nga nauna kara nga ginhana nga paeukpan ro sangka manugturo bago nagsaylo sa ibang classroom ag ginbaril ro sangka estudyante.
Namatay ro nasambit nga estudyante samtang namatay man ko ulihi ro gina-alegar nga gunman. Ginpahayag dugang nga maabu nga iba pa ro posibleng naninahan.
May suksok sigon nga body camera ro suspek ag naga-livestream samtang nagakatabu ro insidente.
Padayun ro imbestigasyon it mga awtoridad agud nga matumod ro motibo sa pagpamaril ag kun paalin nga naipasueod sa campus ro mga armas.
Ro insidente hay kasunod it sambilog pang makangiedlis nga school shooting sa Tacloban City ko Hunyo 22, kun sa siin tatlong estudyante ro napatay ag indi maganaba sa 20 ro naninahan.
