Nagpaguwa it bag-o nga subpoena ro Senate Impeachment Court para sa daywang dati nga special disbursing officers (SDO) halin sa mga ahensya nga ginapamunuan ni Vice President Sara Duterte agud magtestigo sa anang impeachment trial.
Gin-anunsyo ni Senate Impeachment Court Presiding Officer Francis “Chiz” Escudero ro bag-o nga subpoena para sa dating Office of the Vice President (OVP) SDO Gina Acosta ag dating Department of Education (DepEd) SDO Edward Fajarda matapos ro una nga subpoena para kanda nga nagasakop eamang sa mga hearings umpisa Agosto 10 hasta 12.
Owa pa naka-appear sa witness stand sanday Acosta ag Fajarda bangud nagbuhay it daywang adlaw ro pag-usisa kay Commission on Audit-Intelligence and Confidential Funds Audit Office (COA-ICFAO) state auditor Xylene Del Campo.
Nag-issue man it bag-o nga subpoena ro impeachment court para kay House of Representatives Legislative Information Resources Management Department Director Marivic Pareja matapos nga na-delay ro trial ko Agosto 10 bangud sa mabaskog nga pag-uean ag pagbaha tuga it Southwest Monsoon ukon Habagat.
Sanday Acosta, Fajarda ag Pareja ro prosecution witnesses para sa Article 1 nga naga-akusar kay Duterte it sistematiko nga misuse ag irregular liquidation it confidential funds nga naga-abot sa P500 million para sa OVP ag P112.5 million para sa DepEd kat imaw pa ro sekretaryo it ahensya.
