Nagpangayo it bulig pinansyal ro 11 nga residenteng anti-mining nga gin-aresto matapos bungkagon it kapulisan ro andang human barricade sa Barangay Paquet, Kasibu, Nueva Vizcaya ko Agosto 28.
Suno kay anti-mining leader Florentino Daynos, kinahangean it mga residente it ayuda para sa piyansa. Sambilog sa mga naaresto ro gindaea sa ospital matapos maninahan sa ginpatigayon nga dispersal.
Nagpatigayon it human barricade ro mga residente agud nga baeabagan ro pagsueod it mga saeakyang may daeang langis para sa exploration activities it mining company.
Ginpamilit it mga residente nga kontra sanda sa mining exploration bangud sa gina-alegar nga kakueangan sa konsultasyon ag mga kinahangeanon nga permit. Samtang, ginpahayag it Nueva Vizcaya Police nga rumesponde eamang sanda sa sangka 911 emergency call bangud sa naka-abang nga karsada, nga suno kanda hay sangka municipal road nga bukas sa publiko.
Nagapangatubang ro mga nagprotesta sa mga kasong grave coercion, resistance ag disobedience to a person in authority ag andang mga agents.
Sa pihak nga parte, ginkundina it pilang residente ag grupo ro pag-aresto ag dispersal sa mga anti-mining protesters sa Kasibu, Nueva Vizcaya, kun sa siin ginakabig it pila ro aksiyon it pulis bilang gina-alegar nga masyadong brutal.
Suno sa dating opisyal it gobyerno nga si Loreta Ramel-Galima, matawhay nga ginpatigayon it mga nagaprotesta ro andang kinamatarung. Samtang, ginpamilit man ni Atos Margie Kidsolan nga dapat buytan it pulis ro andang obligasyon nga magpatuman it laye, ipabilin ro kalinong ag kaayusan, ag siguraduhon ro kaeowasan it publiko.
Ginakilaea man ni Nueva Vizcaya Police Director Col. Paul Bometivo ro mga batikos sa andang operasyon. Suno kana, naintindihan it kapulisan ro pagkadismaya it komunidad kasunod it andang pagresponde sa sangka 911 emergency call sa Kasibu.
