KALIBO, Aklan—Padayon nga nagapakamatig-a ro daywang ka mga maeagkong establishimento partikular ro Willy’s Rock Resort ag Boracay Plaza Hotel nga magself demolish bangud sa pag-eabag kara sa 25-plus-5 road easement sa pihak nga gintaw-an sanda it 15 diyas nga ultimatum it Boracay Inter-agency Rehabilitation Management Group (BIARMG).
Raya ro ginkumpirma ni BIARMG general manager Natividad Bernandino sa interview it Bombo Radyo.
Suno kana, sa 10 nga gintaw-an it ultimatum hay nakapag-self demolish eon ro waeo ag sanda eamang ro nagapabilin nga pasaway kon siin hasta eon lang sa adlaw it martes ro palugit nga ginta-o kanda it gobyerno.
Ginpahayag dugang nga kon inde pa ro mga raya maghueag hay mismong ro inter-agency ro magaguba sa andang establishimento nga ginsakop ro gintaeanang road easement ag paga-isyuhan ro mga raya it closure order.
Haeos 50 porsyento pa eamang sa mga establishimeto ro naka-comply it mga nagakaigong requirements ag ginasiguro it mga inspection team nga nagasunod ro mga raya sa rules and regulations.
Samtang, ro problema suno kana makaron sa isla hay ro mga turista nga uwa it kasayuran sa mga ginapatuman nga ordinansa sa idaeom it Project BESST ukon Boracay enhanced security, strategy and tactics kon siin maabo sa mga raya ro nadadakpan ag nagabayad it mga penalidad.
May kaangtanan kara, nag-apela imaw sa mga accommodation establishiments nga i-breifing anay ro andang mga turista antes nga paguwaon.
