KALIBO, Aklan — Gin-aresto ro daywa sa pitong kaeaeakin-an nga gina-alegar nga mga miyembro it sangka private armed group matapos nga maispatan sa Brgy. Tigum sa nasambit nga banwa ko gabi-i it Sabado, Mayo 10, 2025.
Sa pihak kara, ginpahilway man it kapulisan ro daywa ag ginturn-over sa andang mga abogado, bandang alas-9:00 it agahon it Domingo bangud sa kawad-an it bastante nga ebidensiya.
Sambilog sa mga suspek hay tumandok mismo it nasambit nga lugar samtang ro sambilog pa hay residente it Brgy. Aparicio, Ibajay ag may baeay man sa Brgy. Poblacion, Makato.
Suno kay P/Capt. Christian John Nalangan, hepe it Buruanga Municipal Police Station nga ginpahilway nanda ro mga raya bangud man sa reglementary period of detention.
Dugang pa ni P/Capt. Nalangan nga matapos nga makabaton it report angot sa mga naispatan nga armadong kaeaeakin-an hay insigida sanda nga nagresponde sa lugar ag nagpatigayon it maid-id nga imbestigasyon.
Sa ginkasa nga hot pursuit operation, owa nanda naabutan ro nasambit nga mga indibidwal. Apang daywang eaeaki ro nagguwa halin sa eskenita, kun sa siin ginturo sanda it mga residente nga kaibahan sa grupo.
Sa pagkapkap, owa kanda it narekober nga armas ag owa man nagakasinato ro andang mga pahayag.
Ginbitbit sanda sa Buruanga MPS para sa dugang nga imbestigasyon. Sangka testigo ro nagpahayag nga samtang nagapungko sa kamalig, nag-agi ro nasambit nga grupo, kun sa siin gulpi nga nagtunog ag naghayag ro anang cellphone.
Gina-alegar nga ginkasahan imaw ag gintutukan it armas it grupo nga sa mayad nga swerte hay nagderetso sa andang paeanawon.
Sa pihak nga parte, ginpahayag pa ni Nalangan nga owa eon nanda ginpaidaeum sa inquest proceeding ro mga suspek base man sa advice it Aklan Provincial Prosecutors Office bangud sa kawad-an it bastante nga ebidensiya, apang pwede man gihapon nga ipasaka ro kaso pinaagi sa regular filing.
Ginasugid nga maskin nga ro nasambit nga private armed group hay gina-alegar nga tagasuporta it sangka political party, apang owa nanda raya ginakabig nga election related incident.
Ro limang nakapaeagyo hay owa pa nakilaea hasta sa makaron.
