KALIBO, Aklan — Sambilog ro patay samtang sambilog pa ro naninahan matapos nga bumunggo ro andang ginasakyan nga motorsiklo sa pader sa national highway nga sakop it Brgy. Colong-colong, Ibajay, Aklan.
Nag-angkon it nina sa ueo ro biktimang si Kevin Teodosio, 16, residente it Brgy. Agbago, Ibajay matapos nga inapok sa pagkabunggo sa konkretong pader it sangka panimaeay.
Samtang, padayun nga ginabueong sa sangka pribadong ospital sa Kalibo ro anang angkas nga si Ishien Cunanan, 15, residente it Brgy. Laguinbanua, Ibajay bangud sa naangkon nga mga nina sa nagkaeain-eain nga parte it eawas.
Suno sa mga nakasaksi nga madasig ro daeagan it motorsiklo nga ginasakyan it daywang biktima nga gina-alegar nga sa idaeum it impluwensiya it makahieilong nga ilimnon.
Ginasugid nga naduea-an it kontrol ag eumapaw sa karsada ro andang motorsiklo sa pakurbada nga daeanon rason it pagbunggo sa pader.
Inapok ro daywa ag napuruhan ro driver nga si Teodosio.
Mag-eowas nga naka-inom ro mga biktima hay owa man sanda it suksok nga helmet.
