KALIBO, Aklan — Naga-abot sa 2,000 nga mga Akeanon ro pwedeng maka-renew ag maka-apply para sa Philippine passport.
Raya hay matapos nga ginkumpirma it Sangguniang Panlalawigan nga aprubado eon it Department of Foreign Affairs ukon DFA ro request it provincial government angot sa Passport on Wheels.
Pwede sigon nga makabo-oe it application form sa SP building umpisa sa Oktubre 14 ag ro registration hay maga-umpisa sa Oktubre 16 hasta 18 sa kilid it ABL Sports and Cultural Complex sa provincial trade hall.
Ro pag-proseso kara hay pagahimuon sa Nobyembre 15 hasta 17.
Ro mga new passport applicants hay required nga magsumite it confirmed online appointment ukon COA, personal nga makapakita sa Passport On Wheels agud nga magpasa it accomplished application form, original copy it authenticated birth certificate nga gin-isyu it Philippine Statistics Authority ukon PSA ag valid identification cards nga gin-isyu it gobyerno .
Para sa mga gustong mag-renew it andang passports, ro requirements hay kapareho sa bag-ong aplikante eakip ro presenteng e-Passport, dating passport ag photocopy kara .
Hugut nga ginapatuman ro first come, first serve basis sa pagbo-oe it aplikasyon .
Ro Passport On Wheels hay sangka offshore processing center para sa DFA nga nagabaton it pag-proseso it bag-ong passports ukon passport renewal base sa DFA online meeting.
