KALIBO, Aklan—Ginapabugae it pamilya quimpo ro pag angkon it maabu nga mga baganihan halin sa andang pamilya humalin ko Spanish, American hasta sa tiempo it mga Hapones.
Suno sa ekonomista ag educator nga si Ramon Quimpo, Jr. nga proud sanda nga ro anang lolo nga si 2nd chief justice Victorino Mapa it Supreme Court of the Philippines hay sambilog sa mga ginakilaeang baganihan it Pilipinas.
Si Mapa suno kana hay naging legal adviser it Philippine Revolutionary Government.
Ro anang mga laygay, rekomendasyon ag suhestiyon hay nakatau it mabahoe nga bulig sa pagmadinaeag-on it rebolusyon it Pilipinas kontra sa mga Espanyol rason nga naangkon naton ro kahilwayan.
Bilang pagkilaea hay ginbutangan it marker it national historical commission ko 1984 ro lugar kun sa siin natawo si Mapa sa parte it Martelino St. nga makaron hay ginatindugan it Glowmoon Hotel nga makabig man nga historical place.
Abu suno kana nga mga manugturo ag estudyante ro nagapatigayon it research works sa nasambit nga lugar.
Pila pa sa andang igbata nga naging hero it Aklan hay sanday Col. Pastor Martelino, Capt. Gil Mijares, Lt. Manuel Quimpo, Col. Eliseo Rio Sr. ag iba pa.
Agud nga magapabilin sa memorya it mga aklanon, pila sa mga edipisyo, lugar, kalye ag iba pa hay ginpangaean kanda.
Makita man ro andang mga monumento, marker, ag shrine sa sueod it kalibo pastrana park partikular sa shrine of world war 2 freedom fighters of Kalibo.
Samtang, malipayon suno kana ro andang pamilya bangud nga hasta sa makaron hay nagapadayun ro pagserbisyo nanda sa mga aklanon.
Angot kara, nagpanawagan imaw sa mga millenials nga indi pagkalipatan ro leksyon nga daea it nagtaliwan partikular ro pagbinatasan nga ginpakita it aton nga mga baganihan agud nga maging matarung ag masinueundon nga mga indibidwal.
