POLICE Report — Makaeoeo-oy ro gindangatan it 3-anyos nga ungang babaye matapos nga himuslan ag dayun nga pinatay sa eu-ok it kaugalingon nga magueang nga sabog sa iligal nga droga sa banwa it Jose Abad Santos.
Hubeas nga nasapwan ro bangkay it biktima sa payag nga ginatambakan it mga kopra samtang arestado ro suspek sa sueod it andang baeay sa Sitio Narra, Barangay Nuing, Jose Abad Santos, Davao Occidental.
Presenteng sa kustodiya it Jose Abad Santos Municipal Police Station ro 17-anyos nga suspek ag magueang it biktima.
Sa paunang imbestigasyon it kapulisan, nataeupangdan it andang kaepitbaeay ro suspek nga nag-uli nga lango sa aeak bitbit ro biktima.
Makataliwan ro pilang oras hay may nabatian imaw nga mga pagtangis it unga apang ginbalewala nanda raya hasta nga nakit-an eon lang ro bangkay it unga nga owa it anuman nga eambong, may mga nina ag gaob sa nagkaeain-eain nga parte it eawas.
Insigida man nga nagpangayo it bulig sa mga awtoridad ro kaeapitbaeay it magmaeanghud ag gin-agtunan ro baeay it mga raya kun sa siin naabutan pa it mga pulis ro suspek nga hubeas ag hamuok nga nagakatueog bangud sa aeak ag droga.
Sa estasyon it pulisya, gin-aku it suspek ro anang ginhimo sa anang manghud maskin ro paggamit it iligal nga droga.
Ginapahaum eon ro mga kasong igapasaka kontra sa suspek.
