KALIBO, Aklan—Uwa eon it kabuhi kat gindaea sa sangka ospital sa isla it Boracay ro 19-anyos nga eaeaki matapos sigon raya nga magbigti sa sueod it anang kwarto sa Sitio Hagdan, Barangay Yapak sa isla.
Ginkilaea ro biktima nga si Arnel Taneo, residente it nasambitang lugar.
Suno kay P/Cpl. Edran Rosarito it Boracay PNP, bandang alas-6:00 kabie kat makabaton sanda it tawag halin sa sangka concern citizen kaangot sa nasambitang insidente it pagpakamatay sa lugar kon sa siin madasig man raya nga ginrespondehan.
Uwa eon sigon nanda naabutan ro eawas it biktima sa lugar bangud madasig sigon raya nga gindaea it anang pamilya sa pinakamaeapit nga ospital kon sa siin insigida man raya nga gindeklarang patay it attending physician
Ginasugid nga ro gumankon it biktima ro nakakita kana nga nakabitin sa kesami it anang kuwarto gamit ro sangka nylon.
Kaangot kara, uwa man sigon it problema sa pamilya si Taneo.
Samtang, raya eon ro ikatlong magkasunod nga kaso it pagpakamatay sa Boracay nga nailista sa sueod eamang it sang dominggo.
Una kara, ro sangka 27 anyos nga beach guard nga nakapag-video call pa sa anang asawa antes ro pag-utod sa anang kaugalingon nga kabuhi.
Makataliwan ro daywang adlaw hay sangka 28 anyos man nga mister ro nakit-an nga akabitay bangud sigon sa selos sa anang live-in partner
Maskin uwa it nakit-ang foul play sa mga nasambitang insidente hay padayon gihapon raya nga gina-imbestigahan it pulisya agud masayuran ro mga kaniya-kaniyang rason agud maagapan ro kaparehas kara nga kaso.
