4 ka mga persona, magapangatubang it kaso matapos madakpan nga nagasugae sa Mercedes Village, Brgy. New Buswang, Kalibo

Kalibo Aklan ——-Magapangatubang sa kasong Illegal Gambling ro ap-at ka mga indibidwal matapos nga madakpan nga nagasugae sa binit it karsada sa Mercedes Village, Brgy. New Buswang, Kalibo.

Ginkilaea ro mga suspek nga sanday Richard Cinapunan, 39 anyos; Anthony Frendamano, 74 anyos; Mark Jodel Tadia, 26-anyos ag sangka 16 anyos nga binatilyo.

Ginasugid nga naaktuhan ro ap-at nga nagahampang it pusoy bahig kon sa siin narekober sa mga raya ro sangka set it baraha ag P319 nga kwarta nga ginamit bilang taya.

Ro tatlo hay insigidang gindaea sa taeatapan it pulisya kon sa siin sanda temporaryong nakakulong samtang ro binatilyo hay posibleng igaturn-over sa taeatapan it Department of Social Welfare and Development (DSWD).