KALIBO, Aklan — Ginpasakaan eon it kasong rape with homicide sa Aklan Provincial Prosecutor’s Office ro ap-at nga mga suspek sa rape-slay case it turistang Slovak sa Isla it Boracay ko buean it Marso 12, 2025.
Suno kay P/Capt. Aubrey Ayon, tagapaghambae it Special Investigation Task Group (SITG) Michaela Michova nga ginpasaka ro kaso ko Mayo 30, 2025 matapos nga makatipon it nagakaigo nga mga ebidensiya nga makadum-ok sa ap-at nga mga suspek nga puro mga locals ag owa it eakot nga dumueuong.
Ro pagpasaka it kaso hay pinaagi sa regular filing rason nga hilway pa ro mga suspek.
Ro ap-at nga mga ginkasuhan hay kaibahan sa mga natumod nga persons of interests.
Nauna eon nga gin-aku it sambilog sa person of interest sa Provincial Prosecutor’s Office pinaagi sa extrajudicial confession nga kaibahan imaw sa ginhimo nga pagpatay ag paghimueos sa 23 anyos nga turistang Slovak nga nakita ro bangkay sa sangka abandonadong kapilya sa Boracay.
Natumod man it kapulisan ro tatlong POI kat makita sanda sa sangka closed-circuit television (CCTV) footage nga kaibahan ro biktima samtang sa sangka establisimyento.
Madumduman nga nag-agto sa Boracay si Mickova ko March 1, 2025 agud nga magtambong sa kasae it anang amigang Pinay.
Padayun man ro andang pakikipag-angot sa consul it Slovakian government angot sa update it kaso.
