NATIONAL News — Ginkumpiska it mga tawuhan it Bureau of Customs (BOC) ro ginaboeobanta nga P900 milyon nga balor it mga smuggled nga high-end luxury cars sa ginpatigayon nga operasyon sa Taguig City.
Nasayuran sa BOC nga ro pagka-rekober sa 44 nga unit, kaibahan ro Ferrari, Maserati, ag Rolls Royce, hay ro ikatlong raid nga ginpatigayon it Customs Intelligence and Investigation Service sa mga auto shop sa Metro Manila nga nagabaligya it mga maeahaeon nga saeakyan.
Raya hay kasunod it daywang magkasunod nga operasyon sa ₱1.4 bilyon ag masobra sa ₱366 milyong balor it gina-alegar nga mga smuggled nga saeakyan nga nakumpiska ko nagtaliwan nga domingo sa mga siyudad it Parañaque, Pasay, ag Makati.
Nasayuran sa CIIS, ro mga kotseng nakit-an sa sangka auto shop sa Taguig City hay ginaeakipan it maabung unit it Ferrari, Mercedes-Benz, Porsche, Lexus, ag BMW models, Rolls-Royce, Lamborghini, McLaren, Maserati, ag Dodge, mag-eowas sa iba pa.
Sa sueod it 15 diyas pagkatapos mabaton ro Letter of Authority (LOAs), ro mga responsable sa bodega ag mga saeakyan, kaibahan ro mga tag-ana, lessee, lessor, ag representante hay kinahangean nga magsumite it mga dokumentong nagapamatuod it tamang pagbayad it mga obligasyon ag buwis.
