Patay ro waeong Buddhist monks samtang masobra sa 20 nga iba pa ro naninahan matapos sanda nga bungguan it pickup truck nga ginamaneho it sangka 11-anyos nga unga nga eaeaki samtang nagapatigayon it pilgrimage sa northeastern Thailand, suno sa mga opisyal.
Natabu ro insidente sa probinsiya it Mukdahan, kun sa siin, eakip ro mga biktima sa grupo it 34 Buddhist monks ag limang lay followers nga nagabiyahe halin sa sangka templo sa Mukdahan paagto sa sambilog pang templo sa kaiping nga probinsiya it Ubon Ratchathani, suno kay Mukdahan Governor Vorayan Bunarat.
Lima sa mga monghe ro namatay sa gin-eontaran it aksidente, samtang tatlo pa ro namatay sa ospital. Naninahan man ro 22 nga monghe ag sangka layperson, kaibahan ro ap-at nga una sa kritikal nga kondisyon.
Owa pa it ginpasaka nga kaso ro kapulisan samtang padayun pa nga ginatumod it mga imbestigador ro mga hitabu sa likod it aksidente.
Indi pa makutana it mga awtoridad ro unga bangud nga nagapabilin raya sa state of shock ag owa pa makatau it pahayag.
