Bumagbag ro sangka U.S. Air Force B-52 Stratofortress bomber pilang minutos matapos raya nga mag-takeoff halin sa Edwards Air Force Base sa Mojave Desert sa Southern California, adlaw it Lunes, suno sa U.S. Air Force.
Base sa report, natabu ro insidente bandang alas-11:20 it agahon sa sueod it airfield. Insigida man nga rumesponde ro mga emergency crew samtang nagapadayun ro operasyon sa lugar.
Makita ro sunog ag naga-asu nga parte it disyerto nga haeos kasingbahoe it sangka football field. Owa man it nakitang mga mabahoe nga parte it bumagbag nga eroplano sa lugar it insidente.
Owa pa it ginpaguwa nga impormasyon ro Air Force angot sa numero it mga sakay, kun sa siin may mga nakaeowas, ag kun ano ro misyon it eroplano bago raya bumagbag. Kaeabanan nga may limang tripulante ro B-52 bomber.
Ro B-52 Stratofortress, nga ginhimo it Boeing, hay sambilog sa nagapangunang long-range strategic bombers it militar it Estados Unidos. Masarangan kara nga magdaea it nuclear ag conventional weapons ag magpatigayon it nagkaeain-eain nga operasyong militar, kaibahan ro strategic attack ag maritime operations.
Suno sa Bureau of Aircraft Accidents Archive, raya ro unang pag-crash it sangka B-52 Stratofortress umpisa nga bumagbag ro kaparehong klase it bomber sa Guam ko Mayo 2016. Nakaeowas kato ro tanan nga pitong tripulante.
Owa pa nagtau it dugang nga detalye ro Air Force ag Pentagon samtang nagapadayun ro imbestigasyon sa insidente.
