KALIBO, Aklan—Nagapadayun pa ro search and rescue operation it mga otoridad para mausoy ro siyam nga dag-on nga ungang babaye nga nadanlog kahapon sa Aklan river nga sakop it Purok 1, C. Laserna, Kalibo.
Suno kay Jimmy Isberto, tiyo it biktima nga raya ro kauna-unahan nga natabo nga nag-adto sa suba ro anang gumankon nga owa it magueang nga kaibahan.
Paealigban pa sa pamilya kung ham-an nag-adto ro mga raya sa suba bangud masami sigon sanda nga una eamang nagatinir sa baeay.
Dugang pa kara nga parehong indi kantigo mag-eangoy ro biktima ag anang mga kaibahan nga igkampod.
Ginasugid nga naghugas it siki ro biktima kung siin inanod ro anang tsinelas ag ginhana pa nana raya nga eagson apang aksidente imaw nga dumanlog sa suba.
Nasayuran nga masyadong mabaskog ro sueog it tubi kat matabo ro insidente.
Nagaeaum ro pamilya nga makita eon ro biktima sa mas madali nga tyempo.
Samtang, nagapanawagan man sanda sa publiko nga insigidang makipag-angot kanda ukon sa otoridad engkaso nga may makitang unga nga babaye sa pang-pang ukon mga kaeapit nga kasubaan.
