KALIBO, Aklan—Ginpasiguro it pamunuan it Kalibo International Airport nga haum eon sanda nga magbaton it mga lokal nga turista.
Raya hay kasunod it anunsyo ni Aklan governor Florencio Miraflores nga ginapasugtan eon nga magamit ro nasambit nga paeuparan it mga biyahero ag mga turista paagto sa isla it Boracay para sa holiday vacation.
Nauna eon nga ginpahayag ni Engr. Eusebio Monserate Jr. nga ginkalitan nanda ro kahigayunan kat mabakante ro paeuparan para sa pag-ayos kara partikular ro pagpaeapad it andang terminal area.
Ginaeauman nga ro pagbukas it flights sa KIA hay makabulig sa eubusan nga pagbangon it industriya it turismo kamana man nga makatau it dugang nga trabaho.
Madumduman nga ko Disyembre 9 hay nagpatigayon it simulation exercise ukon dry run para sa onsite full scale emergency exercise agud nga makita kon ano ka preparado ro airport sa pagsabat sa anuman nga posibleng matabu.
Nauna eon nga ro caticlan airport eamang ro gintaeana nga paga-agihan it mga turistang nagabakasyon sa boracay sakay it mga eroplano.
Nagapabilin nga hugut ro mga requirements para sa mga turista eabi eon ro vaccination card ukon vaccination certificate samtang sa mga naka ist dose ukon owa pa nabakunahan kontra covid-19, obligado gihapon nga mag presentar it negatibong resulta it RT-PCR test , 72 oras antes ro pagbiyahe.
