KALIBO, Aklan—Uman nga nagabakaeaka ro mga negosyante sa probinsiya it Aklan sa pag-instrikto eon man sa mga sueundanan sandig sa bag-ong Executive Order ni Aklan Governor Florencio Miraflores.
Raya hay sa atubang it nagatinaas nga kaso it COVID-19 ag sa paeag it Omicron variant kara.
Suno kay Mr. Ramil Buncalan it Philippine Chamber of Commerce and Industry ukon PCCI-Aklan chapter nga pabor sanda sa mga ginpatuman nga bag-ong restrictions nga igapatuman sa domingo nga adlaw, Enero 9 mag-eowas eamang sa uman nga pagpatag-od it operating hours it mga establisimento nga alas-5 it agahon hasta alas-8 it gabi-i.
Angot kara, nagaeaum ro mga negosyante nga indi eon mag-grabe pa ro sitwasyon agud nga maging tayuyon ro daeagan it andang pagnegosyo nga amat-amat pa eamang nga nagabawi.
Hinyu nanda nga ibalik sa dating alas-5 it agahon hasta alas 10 it gabi-i ro operasyon it andang mga negosyo bangud nga haeos tanan eon man nga mga pumueuyu hay bakunado.
Mag-eowas kara, importante suno kana nga maka-intigo eon kita nga magpangabuhi kaibahan ro sakit nga COVID pinaagi sa hugut nga pagpatuman it health and safety protocols.
Dapat sigon nga isipon ro mga negosyo nga gabi-i ro andang operasyon.
Medyu nabalewala suno kana ro nagapangunang katuyuan it vaccination nga makabalik sa normal ro pagpangabuhi ag makabangon ro ekonomiya bangud nga indi eon masarangan it gobyerno ro pagtau it ayuda.
